Sant Jeron – Fr. Moreno Souza

Sant Jeron - Fr. Moreno Souza

Costa ani Clement de S. Iria henchea pormonnem, Mhapxenchi igorz 1594 sthaploli jedna Frei Jeronimo do Espirito Santa zaun also Rakhonddar. Ho motthvaxi Indiek ieilolo teach Vorsachea Abril-Mai mhoinneant. Hea sthapnnarachem nanv Mhapxenche Igorjek poddlem. Misionari vavrak tennem boroch nett dilo. Mhapxem mhollear Bardeschea Zhil’leantlo kendrik ganv ani hea kendrik ganvant igorz ubharunk hea rakhonnddaran nirnnoi ghetlo. Hi igorz ubharunk ganvkaramnim duddvam mozot dili; tea bhair Frei Jeronan denngeo ektthaim kel’leo. He figojek lagu zatalet tin ganv vo tin ganvkari : Mhapxem, Kuncheli ani Khorli.


Frei Paulo do Trindade boroita: “Sorvsettim amkam Sant Jeronanchi igorz asa Mhapxeam zhoim nhoich Bardescho lok pun Bhitorleam okhondd ganvcho porian ani Goencho (mhonnge Tisvaddecho vo Gova-xharantlo) Ektthaim zata kiteak hanga ek SANT (vo BAZAR ) DOR Somara bhorta (aiz Sukrara bhorta ). Hanga ek tollkar-ui (vo don- vosulldar) vosti korta ani to Razachem Bhanddar bhorunk bore “xerafin” (duddu) ektthaim korta, Igorz asa ti nodichea tonddar ani tichem nanv Mhapxem (mhonnge Mhapxenchi Nod) Hanga asat 12 komunhanv-ghevpi, 200 kumsar zavpi ani 236 bhurgim.”


Hi firgoz il’li vaddun geli ani 1720 voros zata mhonnosor, 3389 katolkam aslim. Ho ankddo Frei Francisco da Madre de Deus, vigar dita aplea vakeant.
Frei Manoel da Paixao, Prantik-Vhoddil also tedna, ti igorz novena bandhun kaddli ani ti bandhunk team tin ganvchea lokan mozot dili. He nove bandhavollichem mukdomponn Frei Carlos dos Remedios, Reitor, choloitalo; soglleao ievzonneo nitt adol-bodol kori nastana veavarant ghalunk to vigar ghas ghetalo.
Anikui khobor dil’li asa. Mhapxenche Ijorjent Ochorianche (vo Milagris) Saibinnicho ek Ashram’ asa ani ticho adhar magunk zaito lok ieta. Zaitim iatrekaram ietalint tenkam sompeponnam vo sovloti diunk, 1719 vorsa Frei Francisco da Madre De Deus, hea Reitoran ek asro ubharlo; teach ghorant Saibinniche Konfraricheo vostu ani damam-dennim dovortalet. Ho asro voir eke mallier ghatlo-aiz ozun to asa.

Frei Achilles Meersman, O.F.M. anik S. reitoranchim nanvam dita 1597 tem 1766-7 porian. Nimanno Fransiskani Reitor konn also tem sangunk kotthim. Mons. Gomes Cateo hechea pormonnem Frei Manuel do Rosario (1766-1) pun hoch Vigar teach vorsamnim Nerlucho Reitor also mhonn sangta.
Leopoldo da Rocha S Reitoranchim nanvam dita; techi volleri 1608 vorsa suru zata ani nimanno reitor 1767 vorsa dila to mhollear Frei Manuel do Rosario; hench nanv Nerluche-I igorjechi khobor kortana mellta.


1648 vorsa Frei Gaspar de S. Miguel mhonn ek Reitor Mhapxeam melltta. Ho Vigar mulkan Purtugalacho; hannem pri Thomas Stephens hea Jezuitachea Purannache dusre xapnnek maneatai dili Febrerache 20ver, 1647. 20 vorsam to Bardesant ‘Kiristanvancho Rai’ zaun also. Ho Purtugez Fransiskani Motthvaxi Konkanni bhas bori khollaien xiklolo. Tannem “Sintaxis Copiosissima na Lingoa Bramana” hea nanvan ek koknni viakoronn boroilem ani tem Dr. Jose Pereira, hea Kuddtorkarak sampoddlem “Biblioteca dos Estudos Orientais e Africanos” hea Pustokalaiant ani tem tennem 1968 vorsa Mumboi xapun kaddlam. Dom Frei Francisco da Assuncao e Brito (1775-1782) Arsebisp also tedna igorjechem kopel-mor bandhlolem.