Parish Priest's Letter
Church Information
Articles
Activities
Events
Sunday Masses Animators
Readings for the Month
Masses Intention of the Month
Baptism
Weddings
Catholic Burial
Advertisement

JEZUCHEM PUNORJIVONTPONN, AMCHEM ZOIT

Amchea dhormant Jezuchea punorjivontponnachi porob vhoddantli vhodd porob. Jezuchem punorjivontponn zaun asa Kristanv dhormacho "Maz" ani "Mukutt". Jezuchem punorjivontponn kaddlem zalear ami kortanv tem ier sogllem polkem. "Krist mel'leantlo jivont zaunk nam tor, amchi porgottnni rikami ani tumcho-i bhavart rikamo" (1 Kor 15, 14)

Jezun Aplea punorjivontponnan vorvim mornnacher zoit vhelem. Tachem pask zalem, Tannem poltodd marli. To utorlo: Korttank thaun zoitak, kallokak thaun uzvaddak, niraxiponnak thaun bhavarteak, mornnak thaun jivitak.

Bapan Jezuk zoitachem mukutt kiteak dilo kai? Jezun monis teach borabor Dev zaun aslo punn monis koso jietana apunn Dev mhonn visrun soglle lhanvikaien ek chakar koso to jielo.

Vorsachea-vorsa prachit kallachea poilea aitarak ami Jezuchea tallneachi khobor aikotanv. Khorem mhollear soglleo Tacheo tallnneo amchem hea utram nimattapunk zatat: "Khuris nastana sodvonn kor; vizmitam ochoriam korun Tum bhasailolo soddvonnar mhonn dakhoi." Hi tal'lnni Jezuk nhoich devcharachea tonddantlean, punn pedruchea tonddanntlean ani khursar umkolltana Tachea dusmanchea tonddantlean legun aili.

He tallnecher Jezun sodanch zoit vhelem; zaum soitanak, zaum pedruk "pois sor soitana" mhonnun nakarle ani mogan Aplea khursak veng marli. Hem Tannem nhoich koxttanchea vellar pun aplea ak'hea jivitant kelem "mon'xa baxen jieun moro porian ani eka khursa moro porian To khalto zaun tea-von to linn zalo. Dekhunuch Devan taka vhoir ubarlo" (Fil 2, 8-9)

Jezucher visvas dhorun jietat ani martat tim-vui ek dis Tache songim jivim zatelint mhonn Tannench amkam khatri dilea. Hi khatri amkam Bhag. Pauluchem utramni mellta: "To melo toso morun ami Tache bori ek zaleanv zalear, to jivont zala toso ami-l jivont zaun, Tache bori ek zateleanv" (Rom 6,5)

Hem amchem moron amchea povitr snana disa suru zata. Ani jivit bhor amchem povitr snanan ami jietanv. Dekhunuch bhag. Paulu amkam oxem sangta. "Ami jietanv zalear Deva pasot jietanv ani ami mortanv zalear Deva pasot mortanv, mhontoch zaun jivim, zaun melolim ami Devachim (Rom 14,8)

Amchea Kristi jivitant bogor-bogor amkam Jezuk asleleo teach tallneo ietoleo: Khuris pois kor, pidda-addkolli pois kor; vo dusream utramnim tich tallnni hoch sonvsar tujea jivitacho maz kor: girestkai, podvi, boll vaprun tujem jivit fuddem vhor."

Dekhunuch aiz-khal pidda koxtt ietoch milagri ochorian pattlean dhanvtanv vo amchi girestkai, podvi, boll vaprun amchem jivit sukhi korunk sodtanv.

Jezuchem zoit amchem zatelem zalear ekluch upai ani Jezunuch to amkam suchoila: "Kannak mhozo patt'lav korunk kuxi asa zait, tannem apnnakuch patt korchi, aplo khuris gheuncho ani mhoje pattleam ieumchem (Mk 8, 34)

Jezuchem punorjivontponnant ami bhitor sorum-ia Tachem zoitan vantto gheum-ia ani dor disa tannench ditoli adnea pallun Tachech baxen Bapan amkam toiar kelolea voibhovak pavunk proitn korum-ia.

- Pri Adolfo Alvares

 

 

Previous Articlel